පී.කේ.ඩී.එන්.ටි.කරන්නාගොඩ
ශ්‍රි ලංකාව හා ඉන්දියාව අතර පවතින සබඳතා දීර්ඝ කාලයක සිට පැවත එන්නකි. එකී සබඳතා මෙරට දේශපාලන,ආර්ථික,සමාජ, සංස්කෘතික ආදි සෑම ක්ෂේත්‍රයකටම බද්ද වී ඇත.
ලෝක දේශපාලනය යුගයෙන් යුගයට පරිවර්තනය වී තිබේ. දේශපාලන ව්‍යාපාර සිය දර්ශනය වෙනස් මුහුණුවරකින් වර්තමානය ස්පර්ශ කර ඇත. ද්ව් ධ්‍රැවිය භූ,දේශපාලනය බහු ධ්‍රැවීය අවකාශයේ පවති. නව කළාප සවිමත් වෙමින් ලෝක දේශපාලන ස්වරූපය නව්‍යත්වයක් කරා එළඹ තිබේ.
ඉන්දියාව යනු තවදුරටත් ශ්‍රි ලංකාවේ අසල්වැසියා පමණක් නොවේ. බලවත් රාජ්‍යයකි.භාරත දේශය යන්න එහි අග්‍රාමාත්‍ය නරේන්ද්‍ර මෝදි ගේ සංකල්පනාවකි. ඉන්දියාව අසල්වැසි ශ්‍රි ලංකාවට ප්‍රේම කරයි. එපමණක් නොව උදව් උපකාර ද සිදු කරයි.
ශ්‍රි ලංකා රාජ්‍යය මෙහෙයවන ආණ්ඩුව සේම ඊලඟ ආණ්ඩුව සේ සැලකෙන විපක්ෂය සමගත් ඉන්දියාව කුළුපඟය. ඔත්තු සේවා හරහා ඉන්දියාව මෙරට තතු පැහැදිලි කර ගනී.ජාතික ජනබලවේගයට ඉන්දියාව නිල සාකච්ඡා සඳහා ඇරයුම් කරන්නේ ඒ අනුවය. ශ්‍රි ලංකා දේශපාලනයේ විය හැකි වෙනස ඉන්දියාව තේරුම් ගෙන ඇත.
ජාතික ජන බලවේගය ශ්‍රි ලංකාවේ ශ්‍රිඝ්‍රයෙන් ඉදිරියට එන දේශපාලන ව්‍යාපාරය වන බවත්,මහජන ඒකරාශිවීම ඒ සඳහා ක්‍රමයෙන් ඉහල ගොස් ඇති බවත් දෘශ්‍යමාන සත්‍යයකි.
අනුර කුමාර දිසානායක ඇතුළු ජාතික ජන බලවේගයේ දූත පිරිස ඉන්දියාව සමග රාජ්‍යතාන්ත්‍රික සාකච්ඡා සඳහා ප්‍රවිශ්ඨවීම සාම්ප්‍රදායික දෘෂ්ටි කෝණයෙන් විමසීම උගහටය.
දේශපාලනයේ සදාකාලික මිතුරන් මෙන්ම සතුරන්ද නැත. නමුත්, අයුක්තිය වෙනුවට යුක්තිය, අනීතිය වෙනුවට නීතිය, අසත්‍ය වෙනුවට සත්‍යය, උණ්ඩය වෙනුවට ඡන්දය ආදි ලෙස ධනාත්මක විපර්යාස මත මිත්‍රත්වය පවත්වා ගැනීම යහපත්ය.
ජනතා විමුක්ති පෙරමුණ, ජාතික ජන බලවේගයේ අරටුවයි.එම පක්ෂය අතීත සටන්කාමි සන්නද්ධ අරගල වල සිට ප්‍රජාතන්ත්‍රවාදි ප්‍රවාහයට පැමිණ තිබේ.එසේ පරිවර්තනයකට ලක් වු දේශපාලන ව්‍යාපාරයකට අවශ්‍ය තත්ත්වයන් මත ගත නොහැකි හැඩහුරුව කවරේද?
ඉන්දීය සංචාරය තුල කළ කී දෑ අනුර කුමාර දිසානායක ප්‍රමුඛ දූත පිරිස මෙරට පැමිණ වැඩි විස්තර කියනු ඇත. එතෙක් අපි ඉවසමු.
එසේම, අනුර කුමාර දිසානායක ගේ ඉන්දීය සංචාරය ගැන විවිධ දේ නොයෙක් දෙන පවසා තිබේ. ඇතැමෙකුට අනුව එය උගුලකි. තවකෙකුට අනුව ඇමකි. නමුත්,විපක්ෂයේ නායකත්ත්වය සමගි ජන බලවේගයෙන් (SJB) ජාතික ජන බලවේගය (NPP) කරා සංක්‍රාන්තියට භාජනයවීම අප්‍රකාශිත යථාර්ථය නොවන්නේද? අපි තව හිතමු!
