සරුසාර අස්වැන්නක් ලබාදීම වෙනුවෙන් හින්දු භක්තිකයන් හිරු දෙවියන් නමදින තෛපොංගල් උත්සවය අදට යෙදී තිබෙනවා.
නෙලාගත් අස්වැන්නේ පළමු කොටස සූර්යයාට පුදමින් කලගුණ සලකා නව වසරක උදාව සටහන් කිරීම තෛපොංගල් උත්සවය සමරමින් අද සිදු කෙරෙනවා.
ජාති, ආගම් භේදයකින් තොරව ලක්වැසි සියලු ජනතාවට සෞභාග්‍ය උදා කිරීම, තමන් සහ රජයේ ඒකායන පරමාර්ථය බව ජනාධිපති ගෝඨාභය රාජපක්ෂ මහතා තෛපොංගල් දිනය වෙනුවෙන් පණිවුඩයක් නිකුත් කරමින් ප්‍රකාශ කළා.
ජනාධිපතිවරයා එහිදී වැඩිදුරටත් සදහන් කර ඇත්තේ දෙමළ ජනතාව සිය අපේක්ෂා ඉටුවන නව වසරක උදාව ලෙස සලකන තෛපොංගල් දිනය ජාතික සංස්කෘතියේ කොටසක් බව සහ නෙලාගත් අස්වැන්නේ පළමු කොටස සූර්යා වෙනුවෙන් පුදන තෛපොංගල් උත්සවය සමාජ සාරධර්ම සංකේතවත් කරන බවයි.
තෛපොංගල් දිනය වෙනුවෙන් නිවේදනයක් නිකුත් කරමින් අග්‍රාමාත්‍ය මහින්ද රාජපක්ෂ මහතා ප්‍රකාශ කළේ අභියෝගාත්මක කාල වකවානුවක වුවද, සෞභාග්‍යමත් දේශයක් වෙනුවෙන් සියලු ජනතාවගේ ජීවන තත්ත්වය උසස් කිරීමට රජය කැප වී සිටින බවයි.
එම නිසා දෙමළ ජනතාවට නැවුම් බලාපොරොත්තු සහිතව තෛපොංගල් උත්සවය සැමරිය හැකි බවත් ජාතික සංහිඳියාවේ දිනයක් බවට අද දිනය පත්වනු දැකීම අපේක්ෂාව බවත් අග්‍රාමාත්‍ය මහින්ද රාජපක්ෂ වැඩිදුරටත් පෙන්වා දෙනවා.
විපක්ෂ නායක සජිත් ප්‍රේමදාස මහතා තෛපොංගල් පණිවුඩයක් නිකුත් කරමින් ප්‍රකාශ කළේ සොබා දහමට සමීපව තෛයිපොංගල් දිනය සැමරිය යුතු බවයි.
ලෝකයට සංහිඳියාව අවශ්‍ය වන බවත්, ඒ සඳහා මානව සංහතියට පැවරී ඇති වගකීම අතිශය වැදගත් බවත් සඳහන් කරන විපක්ෂ නායකවරයා තෛයිපොංගල් උත්සවය ඒ සඳහා පාලමක් කර ගන්නා ලෙස ඉල්ලා සිටිනවා.
මේ අතර, නව චින්තනයකට පිවිසීමට තෛයිපොංගල් දිනය අගනා නිමිත්තක් බව ජනතා විමුක්ති පෙරමුණ තෛපොංගල් දින පණිවුඩයෙන් ප්‍රකාශ කර තිබෙනවා.
Discussion about this post