යාපනය විශ්වවිද්‍යාල පරිශ්‍රය තුළ ස්ථාපිත කර තිබූ සැමරුම් ස්මාරකයක් ඉවත් කිරීමට විරෝධය පළ කරමින් හෙට උතුර පළාත සහ නැගෙනහිර පළාත තුළ හර්තාල් ව්‍යාපාරයක් දියත් කිරීමට තීරණය කර තිබෙනවා.
ඊට දෙමළ ජාතික සන්ධානය ඇතුළු තවත් පක්ෂ කිහිපයක්ද සිය සහයෝගය ලබාදෙන බව ද වාර්තා වනවා.
යුද්ධය අවසන් වී වසර 10 ක් ගතවද්දී 2018 වසරේ යාපනය විශ්වවිද්‍යාල පරිශ්‍රය තුළ මෙම ස්මාරකය ඉදිකර තිබෙනවා.
කෙසේ වෙතත්, පෙරේදා රාත්‍රියේ මෙම ස්මාරකය ඉවත් කිරීමට විශ්වවිද්‍යාල පරිපාලනය කටයුතු කිරීමත් සමඟ ඇතිවූයේ නොසන්සුන්කාරී තත්වයක්.
මෙම සිද්ධිය පාලනය කර විශ්වවිද්‍යාලයේ ආරක්ෂාව තහවුරු කිරීම සඳහා පොලිස් විශේෂ කාර්ය බලකාය කැඳවීමටද පියවර ගැනුණා.
මෙම සිද්ධියට අදාළව විශ්වවිද්‍යාල සිසුන් දෙදෙනෙකු පොලීසිය අත්අඩංගුවට ගනු ලැබූ අතර, ඔවුන් අධිකරණයට ඉදිරිපත් කිරීමෙන් අනතුරුව රුපියල් 50,000 බැගින් වූ ශරීර ඇපයක් මත මුදාහැරුණා.
තවදුරටත් යාපනය විශ්වවිද්‍යාල පරිශ්‍රයට පොලිස් ආරක්ෂාව ලබාදී ඇති අතර, මාතලේ ප්‍රදේශයේදී යුද හමුදාපති ජෙනරාල් ශවේන්ද්‍ර සිල්වාද සිද්ධිය සම්බන්ධයෙන් අදහස් පළ කරමින් කියා සිටියේ අදාළ සිදුවීමට යුද හමුදාවේ කිසිදු සම්බන්ධයක් නොමැති බවයි.
දෙමළ ජාතික සන්ධානයේ මාධ්‍ය ප්‍රකාශක පාර්ලිමේන්තු මන්ත්‍රී එම්.ඒ. සුමන්දිරන් මහතා මේ සම්බන්ධයෙන් අදහස් දක්වමින් කියා ඇත්තේ සිද්ධිය සම්බන්ධයෙන් විරෝධය පළ කරමින් හෙට උතුර නැගෙනහිර පළාත්වල ක්‍රියාත්මක හර්තාල් ව්‍යාපාරයට සිය සහයෝගය ලබාදෙන බවයි.
Discussion about this post