ශ්‍රී ලංකා ක්‍රිකට් අධ්‍යක්ෂ ධූරයට ටොම් මූඩි ?

ශ්‍රී ලංකා ක්‍රිකට් පිලේ ප්‍රධාන පුහුණුකරු ලෙස 2005 වසරේ සිට 2007 වසර දක්වා කටයුතු කළ ටොම් මූඩි ශ්‍රී ලංකා ක්‍රිකට් අධ්‍යක්ෂවරයා ලෙස පත් කිරීමට සැලසුම් කර ඇති බව වාර්තා වනවා.

ක්‍රිකට් ආරංචි මාර්ග සඳහන් කළේ ඒ සඳහා ඔහුට තුන් වසරක කොන්ත්‍රාත්තුවක් පිරිනැමීමට අපේක්ෂා කරන බවයි.

ඕස්ට්‍රේලියාව, එංගලන්තය සහ ඉන්දියාවේ ක්‍රිකට් පුහුණු කටයුතුවල නිරත වූ ටොම් මූඩි වත්මන් පුහුණුකරු මිකී ආතර් සමඟ සුසංයෝගයක් තනනු ඇති බව ක්‍රිකට් විචාරකයින්ගේ අදහසයි.

ටොම් මූඩි ශ්‍රී ලංකා පිලේ ප්‍රධාන පුහුණුකරු ලෙස කටයුතු කළ සමයේ ශ්‍රී ලංකා පිල කැපී පෙනෙන දස්කම් දැක්වූ අතර, 2007 ලෝක කුසලාන තරඟාවලියේ අවසන් තරඟයටද සුදුසුකම් ලැබුවා.