ශ්‍රී දළදා මාලිගයේ දිය අගලේ ආරක්ෂිත බැම්මේ කොටසක් කඩා වැටෙයි

මහනුවර රාජධානි සමය ආරම්භ වීමත් සමඟ ඉදිකර තිබෙන ශ්‍රී දළදා මාලිගා පරිශ්‍රයේ පිහිටි පෞරාණික වටිනාකමින් යුත් දිය අගලේ ආරක්ෂිත බැම්මේ විශාල කොටසක් අද (07) අලුයම කඩා වැටී තිබෙනවා.

පුරාවිද්‍යා දෙපාර්තුමේන්තුව පවසන්නේ පුරා විද්‍යා දෙපාර්තුමේන්තුවේ අනුමැතිය ඇතිව වාරිමාර්ග දෙපාර්තුමේන්තුව මගින් දිය අගලේ ප්‍රතිසංස්කරණ කටයුතු සිදු කරමින් තිබියදී ඊයේ (06) පස්වරුවේ සිට මහනුවරට ඇද හැළුණු අධික වර්ෂාවත් සමඟ මෙම පැති බැම්ම කඩා වැටී තිබෙන බවයි.

රජ සමයේ ඉදිකර තිබෙන මෙම දිය අගල අවස්ථා කිහිපයකදීම ප්‍රතිසංස්කරණයට ලක්ව ඇත.

අධික වර්ෂා තත්ත්වයත් සමඟ සිදුවූ ගිලා බැසීමක් සමඟ ආරක්ෂිත බැම්ම කඩා වැටෙන්නට ඇති බවට අනුමාන කරන අතර පුරා විද්‍යා දෙපාර්තුමේන්තුව හා ඉංජිනේරු අංශ එක්ව ඒ සම්බන්ධව පරීක්ෂණ ආරම්භ කර තිබෙනවා.

ශ්‍රී විෂ්ණු දේවාළය ඉදිරිපස ඇති දේව සන්හිඳ ආසන්නව පිහිටි දිය අගලේ ආරක්ෂිත බැම්මේ මීටර් 10 ක පමණ කොටසක් මෙසේ කඩා වැටී ඇති අතර බැම්මේ තවත් කොටසක්ද කඩා වැටීමේ අවධානමට ලක්ව ඇති අතර පුරාවිද්‍යා දෙපාර්තමේන්තුව ඇතුළු වගකිව යුතු සියලු අංශ මේ සම්බන්ධව දැනුවත්කර තිබෙන බවත් එහි පිළිසකර කිරීම් සඳහා අවශ්‍ය සාකච්ඡා මේ වන විටද සිදුකෙරමින් පවතින බවත් දියවඩන නිළමේ ප්‍රදීප් නිලංගල දෑල මහතා කියා සිටියා.