වූහාන් හි රැදී සිටින සිසුන් ආපසු ගෙන්වා දෙන ලෙස ඉල්ලා ඔවුන්ගේ මාපියන් ඇතුළු පිරිසක් පාකිස්ථානයේ ඉස්ලාමාබාද් නුවරදී විරෝධතාවකට එක්විය.

විදෙස් වාර්තා පවසන්නේ, ඒ පිළිබඳ රජය දරන ස්ථාවරයද මෙහිදී ඔවුන්ගේ දැඩි සේ විවේචනයට ලක්වූ බවයි.

කොවිඩ් නයින්ටීන් ආසාදිතයන් වැඩිවශයෙන් වාර්තා වූ චීනයේ හුබෙයි පළාතේ වූහාන් නගරයේ රැදී සිටි සිය රටවැසියන් ආපසු මව්බිමට ගෙන්වා ගැනීමට බොහෝ රාජ්‍යයන් කටයුතු කළේය.

කෙසේ නමුත් එහි සිරවී සිටින පාකිස්ථාන සිසුන් නැවතත් සිය රාජ්‍යය වෙත ගෙන්වා නොගැනීමට පාකිස්ථානය එකහෙලා තීරණය කළේ, රටතුළ පරස්පර මතවාදයක් ඇති කරමින්.

මුරණ්ඩු තීරණය අත්හැර සිය දරුවන් ආපසු ගෙන්වා දෙන ඉල්ලමින් එම සිසුන්ගේ දෙමාපියන් ඇතුලු පිරිසක් පාකිස්තානයේ ඉස්ලාමාබාද් නුවර විරෝධතාවකට එක්විය.

මෙම විරෝධතාවට රටපුරා විසිර සිටින දෙමාපියන් 400කට වැඩි පිරිසක් එක්ව සිටියේය.

ඔවුන් ඉස්ලාමාබාද් අගනුවර මාර්ග අවුරමින් විරෝධතාවල නිරතවූ බවද විදෙස් වාර්තා වැඩිදුරටත් සඳහන් කළේය.

වූහාන් නගරයේ දැනට පාකිස්තාන සිසුන් 1000කට ආසන්න පිරිසක් රැදී සිටියි.

ඔවුන් සහ වූහාන්හි තත්ත්වය සම්බන්ධයෙන් මාධ්‍ය දැනුම්වත් කිරීම සඳහා එරට සෞඛ්‍ය ඇමතිවරයා ඇතුළු නිලධාරීන් පිරිසක් හමුවක් පවත්වා තිබුණි.

සිසුන් ආපසු ගෙන්වා ගැනීමෙන් පසු සිදුකල යුතු නිරෝධායන ක්‍රියාවලිය සඳහා අවශ්‍ය පහසුකම් තමන් සතුව නොමැති බව පැවසූ ඇමතිවරයා පෙන්වා දුන්නේ, ඔවුන් චීනය තුළ නිරෝධායනයේ රැදී සිටීම වඩාත් යහපත් බවයි.

එහෙත්, එම හමුව අතරතුර කඩා වැදුණු සියගණනක පිරිසක් විරෝධතා දක්වමින් අවධාරණය කර සිටියේ සිය දරුවන් නැවතත් ගෙන්වා දෙන ලෙසයි.

කෙසේ වෙතත් රජය ඒ සම්බන්ධයෙන් කිසිදු සුබවාදී ප්‍රතිචාරයක් මෙතෙක් දක්වා නැහැ.

මෙන්න බලන්න තවත් පුවත්