වසර 3කට පසු පරාක්‍රම සමුද්‍රයේ වාන් දොරටු 10ම විවෘත කෙරේ

වසර 3කට පසු පරාක්‍රම සමුද්‍රයේ වානු දොරටු 10ම විවෘත කිරීමට පියවර ගෙන තිබෙනවා.

මෙම පියවර ගෙන ඇත්තේ පොළොන්නරුව දිස්ත්‍රික්කයට ඇද හැළෙන දැඩි වර්ෂාපතනය හේතුවෙන් පරාක්‍රම සමුද්‍රයේ ජල ධාරිතාව උපරිම මට්ටමට ළගා වෙමින් පැවතීම හේතුවෙනුයි.

වාන් දොරටු 10න් 8ක් අඩිය බැගින් සහ අනෙක් දොරටු දෙක අඩි දෙක බැගින් විවෘත කර තිබෙනවා. එමගින් තත්පරයකට මුදා හැරෙන ජල ධාරිතාව ඝණ අඩි 1620ක්.

පොළොන්නරුව කලාප වාරිමාර්ග නිලධාරීන් සඳහන් කළේ මේ හේතුවෙන් පහත් බිම් ජලයෙන් යටවීමේ අවදානමක් පවතින බැවින් අවධානයෙන් පසුවන ලෙසටයි.

මේ අතර පොළොන්නරුව දිස්ත්‍රික් ආපදා කළමනාකරණ නිලධාරීන් ප්‍රකාශ කළේ පරාක්‍රම සමුද්‍රයේ වාන් දොරටු විවෘත කිරීම හේතුවෙන් පොළොන්නරුව මඩකලපුව මාර්ගයේ ගල්ලෑල්ල ප්‍රදේශයේ මාර්ගය අඩියකින් පමණ ජලයෙන් යටවී ඇති බවයි.