යාපනය ස්ටැලියන්ස් කණ්ඩායමට තවත් විදෙස් ක්‍රීඩකයන් සිව් දෙනෙක්

ලංකා ප්‍රිමියර් ලීග් ක්‍රිකට් තරගාවලියට එක්වන තිසර පෙරේරාගේ නායකත්වයෙන් යුත් යාපනය ස්ටැලියන්ස් කණ්ඩායමට තවත් විදෙස් ක්‍රීඩකයන් සිව් දෙනෙකු එක්වීමට කැමැත්ත පළ කර ඇති බව වාර්තා නවා.

දකුණු අප්‍රිකානු ක්‍රීඩකයන් වන කයිල් ඇබට් සහ ඩුානේ ඔලිවර් සමගින් එංගලන්තයේ රවී බොපාරා සහ ටොම් මුවර්ස් මෙලෙස තරගාවලියට එක්වීමට එකඟතාවය පළ කර තිබෙනවා.

මින් පෙර යාපනය කණ්ඩායමට එංගලන්ත ක්‍රීඩක ඩේවිඩ් මලාන්, පකිස්ථානු ක්‍රීඩකයන් වන අසීෆ් අලී, සොයිබ් මලික් සහ උස්මාන් ශින්වාරි එක් කර ගත්තේය.

එහෙත් එංගලන්ත කණ්ඩායමේ දකුණු අප්‍රිකානු සංචාරය හේතුවෙන් මලාන් තරගාවලියෙන් ඉවත් වූ අතර අසිෆ් පෞද්ගලික හේතුවක් මත තරගාවලියෙන් ඉවත්ව තිබෙනවා.

මලික් සහ ශින්වාරි නවසීලන්ත සංචාරය සඳහා වන පකිස්ථාන සංචිතයට එක්නොවීම හේතුවෙන් මේ තරගාවලියට එක්වනු ඇති.

එහෙත් තවත් විදෙස් ක්‍රීඩකයන් සිව් දෙනෙකුට එක්වීමට අවස්ථාව ඇති හෙයින් මේ ක්‍රීඩකයන් එක්කර ගැනීමට යාපනය කණ්ඩායම කටයුතු කර තිබෙනවා.

33 හැවිරිදි කයිල් ඇබට් සහ 28 හැවිරිදි ඩුආනේ ඔලිවර් ජාතික කණ්ඩායමෙන් ඉවත්ව ඇති අතර ඔවුන් මේ වන විට එංගලන්ත ප්‍රාන්ත තරගාවලියට එක්ව සිටිනවා.

35 හැවිරිදි රවී බොපාරා ද අන්තර්ජාතික ක්‍රිකට් පිටියට සමුදී ඇති අතර යොවුන් ක්‍රීඩකයකු වන ටොම්ට තවමත් අන්තර්ජාතික තරග වරම් හිමිව නැහැ.

එල්.පී.එල්. තරගාවලිය නොවැම්බර් මස 26 වනදා සිට දෙසැම්බර් මස 16 වනදා දක්වා හම්බන්තොට මහින්ද රාජපක්ෂ ක්‍රීඩාංගණයේදී පැවැත්වීමට නියමිතයි.

එහි පළමු තරගය නොවැම්බර් 26 වනිදා සමාරම්භක උත්සවයෙන් පසුවම පැවැත්වීමට කටයුතු යොදා තිබෙනවා.

ඒ කොළඹ කණ්ඩයාම සහ මහනුවර කණ්ඩායම අතරයි.