පාකිස්ථාන සහ බංග්ලාදේශ ගුවන් හමුදාපතිවරුන්, අග්‍රාමාත්‍ය මහින්ද රාජපක්ෂ මහතා අරලියගහ මන්දිරයේදී හමුව තිබෙනවා.
ශ්‍රී ලංකා ගුවන් හමුදාවේ 70 වැනි සංවත්සර සමරුවට සහභාගී වීම සඳහා පකිස්ථාන ගුවන් හමුදාපති එයාර් චීෆ් මාර්ෂල් මුජාහිඩ් අන්වර් ඛාන් සහ බංග්ලාදේශ ගුවන් හමුදාපති එයාර් චීෆ් මාර්ෂල් මසිහුසාමාන් සර්නියාබාත් යන මහත්වරුන් මෙරටට පැමිණ සිටිනවා.
අග්‍රාමාත්‍ය කාර්යාලය පැවසුවේ, අරලියගහ මන්දිරයේදී පැවති අග්‍රාමාත්‍ය මහින්ද රාජපක්ෂ සහ ගුවන් හමුදා ප්‍රධානීන් අතර සාකච්ඡාවේදී ක්ෂේත්‍ර රැසක් පිළිබඳව අවධානය යොමු වූ බවයි.
ශ්‍රී ලංකාවට ලබා දිය හැකි තාක්ෂණික සහය මෙන්ම, මෙරට ගුවන් හමුදා නිලධාරීන්ට ලබා දිය හැකි පුහුණු පාඨමාලා පිළිබඳව පාකිස්ථාන සහ බංග්ලාදේශ ගුවන් හමුදාපතිවරුන් අග්‍රාමාත්‍යවරයාට සැලකර සිටියා.
මෙහිදී අදහස් දැක්වූ පකිස්ථාන ගුවන් හමුදාපති, එයාර් චීෆ් මාර්ෂල් මුජාහිඩ් අන්වර් ඛාන් මහතා පැවසුවේ, පකිස්ථාන අග්‍රාමාත්‍ය ඉම්රාන් ඛාන් සංචාරයෙන් දින කිහිපයකට පසුව ශ්‍රී ලංකාවේ සංචාරය කිරීමට ලැබීම දෙරට අතර සබඳතා ශක්තිමත් කිරීමක් සහ වැඩිදියුණු කිරීමක් බවයි.
පකිස්ථානයේ ක්රිකට් ක්‍රීඩාව නැවත නගාසිටුවීමට ශ්‍රී ලංකාව කළ මෙහෙයට ස්තුති වන්ත වන බවත්, 2019 වසරේදී ශ්‍රී ලංකා ක්රිකට් කණ්ඩායම පකිස්ථානයේ සංචරය කිරීම ලොව සෙසු රටවලට පකිස්ථානයේ ක්‍රීඩා කිරීම සඳහා විශ්වාසය ඇති කිරීමට ඉවහල් වූ බවත්, පකිස්ථාන ගුවන් හමුදාපතිවරයා පෙන්වා දුන්නා.
අග්‍රාමාත්‍ය කාර්යාලය පැවසුවේ, මීට අමතරව මෙම සාකච්ඡාවේදී ශ්‍රී ලංකාව, පකිස්ථානය, බංග්ලාදේශය යන රටවල කොවිඩ්තත්ත්වය,ආර්ථිකය නගාසිටුවීම,කලාපීය සහයෝගීතාව සහ සංචාරක ක්ෂේත්‍රය ඇතුළු කරුණු ගණනාවක් පිළිබඳවද අවධානය යොමු වූ බවයි.
Discussion about this post