ප්‍රවීන රංගධර ජයලාල් රෝහණ සිය ජිවන ගමනෙන් සමුගනී….

ප්‍රවීන රංගධර ජයලාල් රෝහණ මහතා සිය ජිවන ගමනෙන් සමුගෙන තිබෙනවා.

රාගම රෝහලේ ප්‍රතිකාර ලබමින් සිටියදී ඔහු අභාවප්‍රාප්ත වී ඇති අතර මියයන විට ඔහු 56 හැවිරිදි වියේ පසුවිය.

ජයලාල් රෝහණ කියලා කියන්නේ අපේ රටේ බොහෝ දෙනෙක් ආදරය කරන අපිට සිටි ජේෂ්ඨ රූපණවේදියෙක්.

තමන්ට ලබෙන චරිතය ආයාසයකින් තොරව ප්‍රේක්ෂක මනසේ සනිටුහන් කරන්නට ඔහුට ඇත්තේ නිසඟ හැකියාවක්.

වේදිකාව, සිනමාව සහ ටෙලිනාට්‍යය යන සකලවිධ මාධ්‍යයන්හි සිය ප්‍රතිභාව පළ කළ ඔහු, ගුරුවරයෙක් මෙන්ම සම්පත්දායකයකු ලෙසද සිය සේවය සමාජගත කළ, ඇත්ත ඇති සැටියෙන් විවේචනය කළ සෘජු අදහස් දැරුවෙකි.

ජාතික රූපවාහිනියේ විකාශය වූ “ඉසුරු යෝගය” ටෙලිනාට්‍යයේ “මුතුමිණ” ලෙස ඔහු රඟපෑ චරිතය මෙරට අතිශය ජනාදරයට පත් වූ අතර, ඒ වෙනුවෙන් 11 වන සුමති සම්මාන උළෙලේදී වසරේ හොඳම නළුවා ලෙසද සම්මානිත විය.

“සඳගලතැන්න” ටෙලිනාට්‍යයේ ග්‍රාමසේවක චරිතයද ඔහුගේ එලෙස ජනප්‍රිය වූ තවත් රංගනයකි. ඔහුගේ ඒ කතා විලාසයත්, ස්වරූපයත් අප සිත් තුළ සදානුස්මරණීය ය.