නිරෝධායනයට ලක් කර සිටි බෝගම්බර රැඳවියෙකු පළා යයි – තවත් රැඳවියෙකු මරුට

මහනුවර පැරණි බෝගම්බර බන්ධනාගාරයෙන් පළා යෑමට තැත්කළ රැඳවියෙකු ජීවිතක්ෂයට පත්වී ඇති අතර, තවත් තුන් දෙනෙකු අත්අඩංගුවට ගනු ලැබූ බව බන්ධනාගාර කොමසාරිස් ජනරාල් තුෂාර උපුල්දෙනිය මහතා පවසනවා.

ඔහු වැඩිදුරටත් සඳහන් කළේ නිරෝධායනයට ලක් කර සිටින රැඳවියන් පස් දෙනෙකු ඊයේ රාත්‍රියේ මෙලෙස බන්ධනාගාරයේ තාප්පයෙන් පැන පළා යෑමට උත්සාහ කර ඇති අතර, ඉන් එක් අයෙකු පළාගොස් ඇති බවයි.

මෙම රැඳවියන් පස් දෙනාම මත්ද්‍රව්‍ය වැරදි සම්බන්ධයෙන් බන්ධනාගාරගත කළ අයයි.

ඒ අතුරෙන් මියගිය රැඳවියා මත්ද්‍රව්‍ය ග්‍රෑම් 500 ක් ළඟ තබා ගැනීම සම්බන්ධයෙන් අනුරාධපුර ප්‍රදේශයෙන් අත්අඩංගුවට ගත් අයෙකු වනවා.

කෙසේ නමුත්, සිද්ධිය සම්බන්ධයෙන් පරීක්ෂණයක් පැවැත්වීම සඳහා කෑගල්ල බන්ධනාගාර අධිකාරීවරයා පත්කර තිබෙනවා.