නාය යෑමේ අධි අවදානම් පවුල් නැවත පදිංචි කිරීම් කඩිනම් කෙරේ

නාය යෑමේ අධි අවදානමට ලක්වූ ප්‍රදේශවල ජීවත් වන පවුල් වෙනත් ස්ථානවල නැවත පදිංචි කිරීමේ ව්‍යාපෘතිය කඩිනම් කිරීමට රජය තීරණය කර තිබෙනවා.

නාය යෑමේ අධි අවදානම පවතින ප්‍රදේශවල පවුල් 15,801ක් ජීවත් වන අතර ඔවුන් නැවත පදිංචි කිරීම සඳහා ක්‍රියාත්මක කළ නිවාස ව්‍යාපෘතිය විවිධ හේතු මත මන්දගාමී වී ඇති බව රජය හඳුනා ගෙන ඇත.

මේ ව්‍යාපෘතිය යටතේ මේ වන තෙක් නැවත පදිංචි කිරීමට හැකියාව ලැබී ඇත්තේ පවුල් 15,801න් පවුල් 4,700ක් පමණි.

එහෙත් මේ ප්‍රදේශවල ජනතාවට දිනපතාම පාහේ අවදානමක් සහිතව ජීවත්වීමට සිදුවීම සැලකිල්ලට ගෙන ඔවුන් වෙනුවෙන් වන නිවාස ව්‍යාපෘතිය කොන්ත්‍රාත්කරු මෙහෙය වන ව්‍යාපෘතියක් ලෙස කඩිනමින් අවසන් කිරීමට රජය සැරසේ.

ඒ අනුව ඉතිරි පවුල් 11,101 අදියර දෙකක් යටතේ කඩිනමින් නැවත පදිංචි කිරීමට තීරණය කර ඇති අතර 2021 වසරේදී ආපදාවලට ඔරොත්තු දෙන නිවාස 2,000ක් කඩිනමින් ඉදි කර එම ජනතාව නැවත පදිංචි කිරීමට නියමිතයි.

නාය යෑමේ අධි අවදානමට ලක්වූ ප්‍රදේශවල ජීවත් වන පවුල් වෙනත් ස්ථානවල පදිංචි කිරීම සඳහා රජය රුපියල් ලක්ෂ හතරේ සිට ලක්ෂ 16 දක්වා මුදල් ක්‍රම කිහිපයක් යටතේ ගෙවනු ලබයි.