ශ්‍රී ලංකාවෙන් කොරෝනා වෛරස ආසාදිත තවත් රෝගීන් 392 දෙදෙනෙක් අද(15) උදෑසන 6 පමණ වන විට තහවුරු කරගෙන ඇති බව කොවිඩ්-19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය පවසනවා.
එම මධ්‍යස්ථානය නිකුත් කළ නිවේදනයේ දැක්වෙන්නේ ඉන් 389 දෙනෙකු දේශීය හඳුනා ගැනුණු බවයි. සෙසු තිදෙනා විදේශයන්හි සිට මෙරටට පැමිණි ලාංකිකයන් තිදෙනෙක් වනවා.
ඒ අනුව හඳුනාගත් නව ආසාදිතයන් අතරින් වැඩිම පිරිස වන 205 දෙනෙකු කොළඹ ප්‍රදේශයෙන් හඳුනාගෙන ඇති අතර ගම්පහ ප්‍රදේශයෙන් හඳුනාගෙන ඇති ආසාදිතයන් සංඛ්‍යාව 40ක්.
මේ අතර කළුතර ප්‍රදේශයෙන් ආසාදිතයන් 14 දෙනෙක් ලෙසත් වාර්තා වන බවයි කොවිඩ්-19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය පවසන්නේ.
අද(15) උදෑසන 6 පමණ වන විට මිනුවන්ගොඩ ඇඟලුම් කර්මාන්ත ශාලාවට සහ කොළඹ පෑලියගොඩ මාළු වෙළෙඳ පොළට සම්බන්ධ පොකුරෙන් වාර්තා වන කොවිඩ් 19 ආසාදිත සම්පූර්ණ පුද්ගලයන් සංඛ්‍යාව 13,079ක් වනවා.
ඉන් පුද්ගලයන් රෝගීන් 3,106 දෙනෙක් මිනුවන්ගොඩ ඇඟලුම් කම්හල් පොකුරෙන්ද තවත් 9,973 දෙනෙක් පෑලියගොඩ මාළු වෙළෙඳ පොළ පොකුරෙන්ද වාර්තා වනවා.
කෙසේ වෙතත් මිනුවන්ගොඩ සහ පෑලියගොඩ කොවිඩ් පොකුරේ ආසාදිතයන්ගෙන් මේ වන විට පුද්ගලයන් 7,899 දෙනෙක් පූර්ණ සුවය ලබා ඇති බවයි කොවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය පවසන්නේ.
Discussion about this post