දියණියට දුන් පොරොන්දුව ගැන දුකක් තියෙනවා – ධම්මික ප්‍රසාද්

තම දියණියගේ බලාපොරොත්තුව ඉටු කිරීමට නොහැකිවීම හැර සිය ක්‍රිකට් දිවියේ කිසිදු පසුතැවීමක් තමා වෙත නොමැති බව ශ්‍රී ලංකා හිටපු වේග පන්දු යවන ක්‍රීඩක ධම්මික ප්‍රසාද් පැවසුවේය. එස්.එස්.සී. පිටියේදී පැවැති සිය ජාත්‍යන්තර ක්‍රිකට් දිවියෙන් සමුගැනීමේ නිල මාධ්‍ය සාකච්ඡාවේදීය.

උරහිසේ ඇතිවූ ආබාධයෙන් අනතුරුව සිය දියණිය තමාගෙන් නැවත ශ්‍රී ලංකා කණ්ඩායමට ක්‍රීඩා කරන්නේද යන්න විමසූ විට ‘ඔව්’ ලෙසින් තමා පිළිතුරු දුන්නද, ආබාධය සුව වීමෙන් අනතුරුව තමාට ජාතික ක්‍රිකට් කණ්ඩායමේ ස්ථානයක් අහිමි වීමේ පසුතැවීම තමා වෙත පවතින බව ධම්මික ප්‍රසාද් පැවසුවේය.

මෙහිදී මාධ්‍ය වෙත අදහස් දැක්වූ ප්‍රසාද් ‘ මා මේ තරම් දුර ක්‍රීඩා කරන්නට මගේ සියලුම භෞත චිකිත්සකවරුන් විශාල මෙහෙයක් කළා. ඒ වගේම මගේ ක්‍රීඩා සමාජයේ නිලධාරීන්, සේවකයන් , සුළු සේවකයන් ඇතුළු සියල්ලන්ටම මම ස්තුතිවන්ත වෙනවා.’ යි පැවසුවේය.

මෙම අවස්ථාවට එක්වෙමින් අදහස් දැක්වූ ශ්‍රී ලංකා හිටපු ටෙස්ට් ක්‍රිකට් නායක මාවන් අතපත්තු ‘ධම්මික කියන්නේ උදේ 10 ටත් හවස 5 ටත් එක වගේම හොඳින් පන්දු යවන්න පුළුවන් වේග පන්දු යවන්නෙක්. ඔහු කණ්ඩායමට දුන් දායකත්වය ප්‍රශංසනීයයි. නමුත් ඔහුගේ දක්ෂතාවට වාසනාව හරස් වෙන්න ඇති.’ යි පැවසුවේය.

මෙහිදී ප්‍රසාද් සමගින් ක්‍රීඩා කළ සමකාලීන ක්‍රීඩක රංගන හේරත් සිය මිතුරා සම්බන්ධයෙන්, ‘අපි දෙන්නා ජාතික කණ්ඩායමටත් වඩා ‘ඒ’ කණ්ඩායමේ එකට හිටියා. ඒ වගේම සොඳුරු සිදුවීමක් මතක් කරනවා නම් ඉන්දියාව සමගින් තිබුණු ටෙස්ට් තරගයකදී ධම්මික සමගින් ඉන්දීය ක්‍රීඩක ඉෂාන් ෂර්මා බහින් බස් වීමක් වුණා. එය දුරදිග යයි කියලා හිතුවත් අපිටත් හොරෙන්ම ධම්මික, ෂර්මා එක්ක කෝපි එකක් බොන්න ගිහින්. ප්‍රසාද් එහෙම නිහතමානී කෙනෙක්, යැයි පැවසුවේය.

මෙහිදී මාධ්‍ය වෙත අදහස් දැක්වූ ධම්මික සිය සමුගැනීමෙන් අනතුරුව වෙනත් කිසිදු රටක ජාතික කණ්ඩායමක් නියෝජනය කරන්නට තමා බලාපොරොත්තු නොවන බව පැවසූ අතර ශාරීරික යෝග්‍යතා පරීක්ෂණ කොතෙක් සමත් වුවද තරගය දිනයේදී සිය ශාරීරික යෝග්‍යතාව මත සියල්ල තීරණය වන බවද පැවසීය.

ධම්මික සිය සමුගැනීමෙන් අනතුරුව නාවික හමුදා ක්‍රීඩා සමාජය සමගින් තරග කිරීමට නියමිත බවට වාර්තා වේ. ඔහු සමුගන්නා විට එස්.එස්.සී ක්‍රිකට් ඉතිහාසයේ වැඩිම කඩුළු දවාගත් (351) පන්දු යවන්නා වූ අතර වසර 7ක කාලයක් ශ්‍රී ලංකා ටෙස්ට් සංචිතය නියෝජනය කර තිබේ. සමුගන්නා විට ඔහු ටෙස්ට් කඩුළු 75ක් සහ එක්දින කඩුළු 32ක් දවාගෙන තිබේ.

ප්‍රසාද් සිය ජාත්‍යන්තර ක්‍රිකට් දිවියෙන් සමුගැනීමෙන් පසු සහභාගී වන පළමු තරගාවලිය ‘රෝඩ් සේෆ්ටි’ ලෝක ශූරතාව වේ.

චතුර රණසිංහ