කෝවිඩ් 19 හෙවත් හෙවත් නව කොරෝනා වෛරසය වසංගත තත්ත්වයක් බවට පත්වීමේ අවධානමක් ඇති බැවින් ඒ සඳහා මුහුණ දීම සඳහා ලෝකයේ සියලු රටවල් සුදානම් විය යුතු බව ලෝක සෞඛ්‍ය සංවිධානය අනතුරු අඟවනවා.

ඉරානයේ, ඉතාලියේ සහ ඉරාකයේ නව කොරෝනා වෛරසය ව්‍යාප්තවීමත් සම්බන්ධයෙන් ලෝක සෞඛ්‍ය සංවිධානය සිය අවධානය යොමු කරමින් මේ බව සඳහන් කර සිටියා.

ඉකුත් වර්ෂයේ දෙසැම්බර් මාසයේදී චීනයේ වුහාන් නගරයෙන් ව්‍යාප්තවීම ආරම්භ වූ නව කොරෝනා වෛරසය මේ දක්වා වසංගත තත්ත්වයක් ලෙස නම් කිරිමට ලෝක සෞඛ්‍ය සංවිධානය ක්‍රියා නොකිරිම සම්බන්ධයෙන් ඔවුන්ට දැඩි ලෙස චෝදනා එල්ල වෙමින් පවතිනවා.

මේ අතර එක්සත් ජාතීන්ගේ සංවිධානය කියා සිටියේ ජාත්‍යන්තර අවධානයට ලක්වූ කොරෝනා වෛරසය හේතුවෙන් ලෝක ප්‍රජාව තුල මහජන සෞඛ්‍ය හදිසි අවස්ථාවක් වන ඉහළම අනතුරු ඇඟවීමේ මට්ටමට පසුගිය මාසයක කාලය සිට ලඟා වී ඇති බවයි.

අද වන විට ලෝකයේ ප්‍රධාන පෙලේ කොටස් වෙලඳපොලවල් කඩා වැටී ඇති අතර පළමු වරට ඇෆ්ගනිස්ථානය, ඉරාකය, කුවේට්, බහරේන් සහ ඕමානය යන රටවල් වලින්ද නව කොරෝනා වෛරසය වැළදුණු රෝගීන් වාර්තා වූ බවට එම රටවල් අද නිවේදනය කර සිටියා.

මෙන්න බලන්න තවත් පුවත්