සම්මානනීය ටෙලි සිනමා රංගනවේදිනියක මෙන්ම නර්තන ශිල්පිනියක ද වන දිල්හානි අශෝකමාලා ඒකනායක අද දින සිය උපන්දිනය සමරන්නීය.
“විශ්ව ගීතය” සහ “සාමා” වැනි මුද්‍රා නාටක ඔස්සේ රංගනයට අත්පොත් තැබූ ඇය 1987 වසරේ සරසවිය සිනමා සම්මාන උළෙලේ චන්න විජේවර්ධන සමග කළ මුද්‍රා නර්තනයකින් ඇය බොහෝ දෙනෙක්ගේ අවධානයට පාත්‍ර වූවාය.
එහි ප්‍රතිඵලයක් ලෙසින් ඇය යසපාලිත නානායක්කාරගේ “දේදුන්නේ සමනලියක්” චිත්‍රපටයේ තුෂාරි ලෙස චිත්‍රපට ප්‍රධාන ස්ත්‍රී භූමිකාවකින්ම සිනමාවට අවතීර්ණ විය. සැහැල්ලු කෙළිලොල් චරිත මෙන්ම සංකීර්ණ චරිත නිරූපණයේ ද එකලෙස දස්කම් දක්වන ඇය “වැඩ බැරි නම් වැඩක් නෑ”, “ප්‍රතිඥා”, “ආසයි බයයි”, “මධුරී”, “සුරනිමල” වැනි ජනප්‍රිය ධාරාවේ චිත්‍රපට රැසකින් සිනමා අඹරේ මුදුන්පත් වීය.
ඊට අමතරව “ආකාස කුසුම්”, “මේ මගේ සඳයි”, “එකදා වැහි”, “ගාමණී”, “ධර්ම යුද්ධය”, “හීන හොයන සමනල්ලු” වැනි චිත්‍රපට රැසකින් ඇය සිය රංගන කෞෂල්‍යයද මනාව විදහාපෑවාය. වාණිජමය නිළියක්ව සිනමාවේ ඉහළටම පැමිණ එයින් මතු සම්භාව්‍ය චිත්‍රපට ඔස්සේ ද සිය දස්කම් දැක්වූ ඇය, අද්‍යතන නිළියන් හට ද මහඟු පූර්වාදර්ශයකි.
Discussion about this post