ගව රෝගය දිස්ත්‍රික්ක 14 කට පැතිරෙයි

දිවයින පුරා පැතිර යන ගව රෝගය දිස්ත්‍රික්ක 14කින් පමණ මේ වන විට වාර්තා වනවා.

කිපශු සම්පත්, ගොවිපල ප්‍රවර්ධන හා කිරි, බිත්තර ආශ්‍රිත රාජ්‍ය අමාත්‍ය ඩී.බී. හේරත් මහතා කියා සිටියේ ලිනොච්චිය, වවුනියාව, අනුරාධපුරය, පොළොන්නරුව සහ කුරුණෑගල දිස්ත්‍රික්කවල බහුලව මෙම වෛරස් රෝගය දක්නට ලැබෙන බවයි.

කෙසේ වෙතත් මේ සම්බන්ධයෙන් කඩිනමින් තොරතුරු ලබාදෙන ලෙසට බලධාරීන්ට උපදෙස් ලබාදුන් බව ද හෙතෙම කියා සිටියා.

මෙම ගව රෝගය පිළිබඳව සොයාබැලීම සඳහා පශු සම්පත්, ගොවිපල ප්‍රවර්ධන හා කිරි, බිත්තර ආශ්‍රිත රාජ්‍ය අමාත්‍යාංශයේ ලේකම්වරයාගේ ප්‍රධානත්වයෙන් සත්පුද්ගල කමිටුවක් පත් කර තිබෙනවා.

මෙම කමිටුව මගින් රෝග ව්‍යාප්තිය, එය පාලනය කිරීම සඳහා ගත යුතු ක්‍ෂණික ක්‍රියාමාර්ග මෙන්ම රෝගය වැළඳීම නතර කිරීම සඳහා පළාත් මට්ටමින් කිරි ගොවියන් දැනුවත් කළ යුතු ආකාරය පිළිබඳව නිර්දේශ ඉදිරිපත් කරනු ඇති.

කැෆ්රි ෆොක්ස් නැමති වෛරස් ගණයට අයත් ගවයන්ට වැළඳෙන සමෙහි ගැටිති රෝගයක් වන මෙහි වාහකයා වන්නේ මැස්සන්.