ගතවූ පැය 24 තුල මාරක රියඅනතුරු වලින් ජිවිත 5ක් අහිමි වෙයි

ගෙවුණු පැය 24 තුල මාරක රියඅනතුරු රැසක් දිවයිනේ ප්‍රදේශ කිහිපයකින් වාර්තා වී තිබෙනවා.

පොලිස් මාධ්‍ය කොට්ඨාසය පවසන්නේ එලෙස සිදුවූ අනතුරුවලින් පුද්ගලයින්5 දෙනෙකු ජීවිතක්ෂයට පත්ව ඇති බවයි.

දොම්පේ පොලිස් වසමේ කොස්පැලවත්ත ප්‍රදේශයේ දී සිදුවූ අනතුරකින් පුද්ගලයින් දෙදෙනෙකු ජීවිතක්ෂයට පත්ව තිබෙනවා.

කොස්පැලවත්ත දෙස සිට වානොලුවාව දෙසට ධාවනය වූ යතුරුපැදියක් අධික වේගයෙන් ගමන් කිරීමේදී පැදිකරුට යතුරුපැදිය පාලනය කරගත නොහැකිව මාර්ගයෙන් ඉවතට ගොස් දුරකථන රැහැන් කණුවක ගැටී එම අනතුර සිදුව ඇත.

අනතුරින් මියගොස් ඇත්තේ වයස අවුරුදු 23 හා 25ක් වූ වැලිවේරිය හා මණ්ඩාවල ප්‍රදේශවල පදිංචිකරුවන්.

මේ අතර ගල්කිස්ස පොලිස් වසමේ රත්මලාන ප්‍රදේශයේ දී සිදුවූ අනතුරකින් පුද්ගලයෙක් ජීවිතක්ෂයට පත්ව තිබෙනවා.

පොලීසිය පැවසුවේ ඊයේ (09) උදෑසන 5.45ට පමණ එම අනතුර සිදුව ඇති බවයි.

මොරටුව දෙස සිට මැලිබන් හංදිය අසලින් අත්තිඩිය මාර්ගය දෙසට හරවා, බේකරිය හංදිය දෙසට ගමන්ගත් යතුරුපැදියක් යතුරුපැදිකරුට වේගය පාලනය කිරීමට නොහැකිව මාර්ගයෙන් ඉවතට ගොස් දුරකථන රැහැන් කණුවක ගැටී එම අනතුර සිදුව ඇත.

අනතුරින් බරපතළ තුවාල ලැබූ යතුරුපැදිකරු කළුබෝවිල රෝහලට ඇතුළත් කිරීමෙන් පසු මියගොස් ඇත.

එලෙස මියගොස් ඇත්තේ 32 හැවිරිදි පතිරෙගෙ වත්ත, තෙලිකඩ, ගිනිමැල්ලගඟ ලිපිනයේ පදිංචිකරුවෙකි.

මේ අතර පේරාදෙණිය පොලිස් වසමේ කොළඹ – මහනුවර ප්‍රධාන මාර්ගයේ පොල්ගහමුල හංදිය අසල දී සිදුවූ අනතුරකින් පුද්ගලයෙකු ජීවිත්කෂයට පත්ව ඇත.

එලෙස මියගොස් ඇත්තේ 70 හැවිරිදි අනන්‍යතාව අනාවරණය නොවු පුද්ගලයෙකි.

රාගල පොලිස් වසමේ බෘක්සයිට් හයිෆොරස්ට් මාර්ගයේ හයිෆොරස්ට් ප්‍රදේශයේ සිදුවූ අනතුරකින් 24 හැවිරිදි තරුණයෙක් ජීවිතක්ෂයට පත්ව ඇත.