කොරෝනා එන්නත් රුසියාවේ සියලු වැසියන්ට

රුසියාවේ සියලු වැසියන්ට කොරෝනා එන්නත් ලබාදෙන ලෙස එරට ජනාධිපති ව්ලැඩිමීර් පුටින් උපදෙස් ලබා දී ඇතැයි විදෙස් පුවත් සේවා වාර්තා කරනවා.

එරට නිෂ්පාදිත ස්පුට්නික් V එන්නත සමග එන්නත් ලබාදීමේ වැඩසටහන වේගවත් කරන ලෙස ඔහු නියෝග කර තිබෙනවා.

වෛරසයේ විවිධ ප්‍රභේදවලට එරෙහිවද එන්නත් සංවර්ධනය කළයුතු බවයි ජනාධිපතිවරයා පෙන්වා දෙන්නේ.

කොරෝනා වෛරසය මේ දිනවල රුසියාවේද මේ වන විට සීග්‍රෙයන් පැතිර යමින් පවතින අතර දිනකට ආසාදිතයන් 20,000ක් පමණ එරටින් හඳුනා ගැනෙන බවයි විදෙස් පුවත් සේවා වාර්තා කරන්නේ.

මේ වන විට රුසියාවෙන් වාර්තා වන කොරෝනා වෛරස ආසාදිත සමස්ත සංඛ්‍යාව 3,495,816 දක්වා ඉහළ ගොස් තිබෙනවා.

ඉන් ආසාදිතයන් 2,882,044 දෙනෙක් මේ වන විට සුවය ලබා ඇති අතර එරටින් වාර්තා වන කොරෝනා වෛරස ආසාදිත මරණ සංඛ්‍යාව 63,940ක් වනවා.

ලොව පුරා රටවල්වලින් වාර්තා වන කොරෝනා වෛරස ආසාදිතයන් සංඛ්‍යාව සැලකීමේදී රුසියාව සිව්වන ස්ථානයේ පසුවනවා.