ඔස්ට්‍රේලියානු ෆේස්බුක් පරිශීලකයින්ට නව වාරණයක් පනවයි

ඔස්ට්‍රේලියානු වැසියන්ට, සිය සමාජ මාධ්‍ය ඔස්සේ දේශීය හා විදේශීය පුවත් අඩවි සඳහා පිවිසීම අවහිර කිරීමට ෆේස්බුක් ආයතනය පියවර ගෙන තිබෙනවා.

ඒ ඔස්ට්‍රේලියානු රජය ගෙනා නව නීතියකට ප්‍රතිචාර ලෙසිනි.

මෙහිදී ෆේස්බුක් ඔස්සේ දේශීය හා විදේශීය සියලු පුවත් අඩවි සඳහා පිවිසීමට එරට පරිශීලකයින්ට අවස්ථාව හිමිවන්නේ නැත.

එමෙන්ම එරටදී ෆේස්බුක් ජාලය හරහා කිසිදු පුවතක් හුවමාරු කරගැනීමට හෝ කියවීම ද අවහිර වී ඇත.

පුවත් වෙබ් අඩවිවලට අමතරව සෞඛ්‍ය, හදිසි සේවා හා තවත් වෙබ් අඩවි කිහිපයක් වෙතද ෆේස්බුක් ඔස්සේ පිවිසීමට අවස්ථාව අවහිර වී තිබුණි.

එය වැරදීමක් බවට පැවසූ ෆේස්බුක් අඩවිය, පසුව පියවර ගත්තේ එම තත්ත්වය නිවැරදි කිරීමටය.

ෆේස්බුක් මාධ්‍ය පවසන්නේ ඔස්ට්‍රේලියානු රජය ගෙනා නව නීතියකට ප්‍රතිචාර ලෙස තමන් මේ පියවර ගත් බවයි.

ඔස්ට්‍රේලියානු පුවත් ෆේස්බුක් සමාජ මාධ්‍ය ඔස්සේ හුවමාරුවන අවස්ථාවන් සඳහා නව බදු හඳුන්වාදීමට එම නීතිය මඟින් යෝජනා වී තිබුණි.

ෆේස්බුක් ආයතනය පෙන්වාදෙන්නේ එම නව නීතිය මගින් අන්තර්ජාල ක්‍රමවේදයේ හැසිරීමට බාධා එල්ලවන බවය.

ඔස්ට්‍රේලියානු රජය පිළිතුරු ලෙස පවසන්නේ නව වාරණය සමගින් ෆේස්බුක් ආයතනයේ විශ්වසනීයත්වය පිළිබඳ ගැටලු මතුවන බවයි.