ඉන්දියාව තුළින් කොවිඩ් -19 නව ප්‍රභේද 240ක්

ඉන්දියාව තුළින් කොවිඩ් -19 වෛරසයේ නව ප්‍රභේද 240ක් පමණ හඳුනාගෙන ඇති බව එරට සෞඛ්‍ය විශේෂඥයින් පෙන්වාදී තිබෙනවා.

ඉන්දීය වෛද්‍ය විද්‍යාතනයේ අධ්‍යක්ෂ ආචාර්ය රන්දීප් ගුලේරියා පවසන්නේ මේ හේතුවෙන් එරටින් දෛනිකව වාර්තා වන ආසාදිතයින් සංඛ්‍යාව ඉහළ යමින් පවතින බවයි.

එමෙන්ම මහාරාෂ්ට්‍ර ප්‍රාන්තයෙන් හඳුනාගෙන ඇති කොවිඩ් -19 වෛරසයේ නව ප්‍රභේදය වේගවත් සම්ප්‍රේෂණයක් සහිත භයානක වෛරසයක් විය හැකි බව ද ඔහු පෙන්වා දෙනවා.

ඉන්දීය වෛද්‍ය විද්‍යායතනයේ අධ්‍යක්ෂවරයා වැඩිදුරටත් පෙන්වාදෙන්නේ නියමිත සෞඛ්‍ය මාර්ගෝපදේශ අනුගමනය කිරීම මඟින් වෛරස සම්ප්‍රේෂණයේ වේගවත් බව අවම කිරීමට හැකි වනු ඇති බවයි.

එමෙන්ම කොවිඩ් -19 මර්දන එන්නත ලබාගත් යම් පුද්ගලයෙකුට නව වෛරස ප්‍රභේද ආසාදනය වුවහොත් එහිදී මෘදු රෝග ලක්ෂණ පමණක් පෙන්නුම් කරන අතර වසංගතය පාලනයට එන්නත් ලබාගැනීම අත්‍යාවශ්‍ය බව ද ඉන්දීය වෛද්‍ය විද්‍යා ආයතනයේ අධ්‍යක්ෂ ආචාර්ය රන්දීප් ගුලේරියා වැඩිදුරටත් පෙන්වාදෙන බව විදෙස් මාධ්‍ය වාර්තා කර තිබෙනවා.