ඉන්දියාවේ කොරෝනා එන්නත්කරන වැඩසටහන 16 වැනිදා සිට

බිලියන 1 යි දශම 3 ඉක්ම වූ ජනගහනයක් සහිත ඉන්දියාවේ කොරෝනා එන්නත්කරණ වැඩසටහන ලබන 16 වැනිදා ආරම්භ කෙරෙනවා.

කොරෝනා වෛරසයෙන් ලොව දෙවනුව වැඩිම පීඩාවට පත්වූ රට වන ඉන්දියාවේ කොරෝනා ආසාදිතයින් සංඛ්‍යාව මේ වනවිට 14,051,000 ඉක්මවා ඇති අතර, මරණ සංඛ්‍යාව 151,000 කට අධිකයි.

ඉන්දීය අග්‍රාමාත්‍ය නරේන්ද්‍ර මෝදි ප්‍රකාශ කළේ එරට කොරෝනා එන්නත්කරණ වැඩසටහන කොවිඩ් 19 වෛරසයට එරෙහි සටනේ තීරණාත්මක ඉදිරි පියවරක් බවයි.

එන්නත ලබාදීමේදී කෝටියක් පමණ වන සෞඛ්‍ය සේවකයින්ට සහ තවත් කෝටි දෙකක් පමණ වන කොරෝනා මර්දන සටනේ ඉදිරි පෙළ කණ්ඩායම්වලට ප්‍රමුඛත්වය හිමි වනවා.

ඉන්දීය සෞඛ්‍ය අමාත්‍ය හර්ෂ් වර්ධන් ප්‍රකාශ කළේ එම කණ්ඩායම්වලට නොමිලේ කොරෝනා එන්නත ලබාදෙන බවයි.

වයස අවුරුදු 50 ඉක්මවූවන්ට ඊලඟට කොරෝනා එන්නත් ලබාදෙන අතර, මුල් අදියරේදී කෝටි 30ක් ජනතාව කොරෝනා වෛරසයට එරෙහිව එන්නත් කිරීම ඉන්දියාවේ අරමුණයි.

ඉන්දියාව විසින් බි්‍රතාන්‍ය ඔක්ස්ෆර්ඩ් සරසවි – ඇස්ට්‍රා සෙනෙකා එන්නත මෙන්ම ඉන්දීය භාරත් බයෝටෙක් ආයතනය නිෂ්පාදනය කළ කොවැක්සීන් කොරෝනා එන්නත ලබාදීමට නියමිතයි.

ඔක්ස්ෆර්ඩ් එන්නතද ඉන්දියාවේ පූනේහි සේරම් ආයතනය මගින් නිෂ්පාදනය කරනු ලබන අතර, ඒ අනුව එය හඳුන්වනු ලබන්නේ කොවිෂීල්ඩ් ලෙසින්.