අද දිනයේ ලැබිය හැකි ව්‍යාජ ආදර පණිවුඩයක් ගැන පොලිසියෙන් දැනුම්දීමක්

අදට යෙදෙන ආදරවන්තයින්ගේ දිනයේදී ජංගම දුරකථනවලට ලැබිය හැකි ව්‍යාජ පණිවුඩ සම්බන්ධයෙන් සැලකිළිමත් වන ලෙසට පොලිසිය ජනතාවට දැනුම් දෙනවා.

පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ කියාසිටියේ ජංගම දුරකථනයට කෙටි පණිවුඩයක් ලෙසට හෝ සමාජ මාධ්‍ය ගිණුම් ඔස්සේ මෙම පණිවුඩය ලැබිය හැකි බවයි.

ආදරවන්තයින්ගේ දිනය වෙනුවෙන් වටිනා ත්‍යාගයක් ජයග්‍රහණය කර ඇති බවට මෙන්ම පෙම්වතා හෝ පෙම්වතිය වටිනා ත්‍යාගයක් එවා ඇති බවට මෙම පණිවුඩය මගින් ප්‍රකාශ කරනවා.

පොලිස් මාධ්‍ය ප්‍රකාශකවරයා කියාසිටියේ එය ලබාගැනීමට යම්කිසි මුදලක් තැන්පත් කරන ලෙසට එම පණිවුඩය මගින් ඉල්ලා සිටින බවයි.

වංචනික කණ්ඩායමක් විසින් මෙම කටයුතු සිදුකරන අතර අදාළ ත්‍යාගයේ ඡායාරූපයක් ද සමග ඊමේල් පණිවුඩ ද මේ ආකාරයෙන් ලැබීමේ හැකියාව පවතිනවා.

එබැවින් පොලිසිය දැනුම් දෙන්නේ මෙවැනි වංචනික ක්‍රියාවලට හසු නොවන ලෙසට සහ එලෙස මුදල් තැන්පත් කිරීම් සිදු නොකරන ලෙසටයි.